Mi pans zot la pa bézoin mi ésplik azot, konm i di, lo sans prop. In marmaye sinkan, moin lé sir, i pé konprann in n’afèr konmsa-a moins ké li s’anfoutsa. L’èr-la sé son paran k’i doi ésplik ali pars sa lé dan la konésans dé shoz é la konésans dé shoz sa lé inportan - moin téi sar di la pa fé pou lo shien alé oir la pa vré, mé nou va arparl de sa... Bon ! Astèr kèl sans dan la vi ? Moin la lir par-la na poin arien dsi la tèr i travaye dann in sèl sans. Souvan dé foi lo l’éfé alé épi lo l’éfé rotour lé kitans-a-kitans : konm par ébzanp lo réaksyon épi l’aksyon. Ni pé di galman moindroman ou i fé in n’afèr ou i modifyé sak i apèl la roganizasyon dé shoz, mé pa solman ou i shanj aou par ou mèm. Astèr mi arète la : in kozman sé in kozman, pa in diskour. Ni artrouv pli d’van sipétadyé !