Kan lané 1945, Doktèr Vergès l’a plant in pié d’boi la libèrté déssi plas Barachois, pou fète labolision lésklavaz, in pé té pou sa, in pé té kont sa. Sak té pour té i di lésklavaz laté aboli mé demoun la pa ankor lib pou vréman. Sak té kont té i di, i fo arète èk sa : sak lé fini lé fini, i sar pa parl sa toultan. Na mèm in pé téi di, i fo fé antansion pangar bann ti-kolon va vni fourné, zot sar san-réspé pou l’bon moun, zot va rod konm in rovansh par raport lo passé.
Pti lanp-pti lanp lé shoz la boujé : zordi nana in zour férié pou lo vin désanm, i rokoné la trète bann noir épi lésklavaz konm in krime kont limanité, lo prézidan i sort dir va mète lésklavaz dann program lékol, épi nora in zour sélébrasion éspésial pou bann do moun l’outremer i rès an Frans. Nou la fine bien avansé.
Soman, ni pé domann anou si nout léspri lé fine bien libéré, si li lé pa ankor in pé anklavé. Si la pankor, ni pé éspèr va vni firamézir... Souvan dé foi, Éric Murin, pou Le Cran, i protèst akoz demoun lé pa égal pou rod travay suivan landroi ou i sort.
In pé i réponn lé shoz la bien avansé. Moin pèrsonèl, moin lé dakor lé shoz la avansé, mé la pa pou sa i fo arète dann milié shomin : in pé plis libèrté, in pé plis légalité, sa i fé pa d’tor... Mèm si dolo la fine koulé sou l’pon dépi 1945.

Justin