Mésyé zé Médam, koz èk moin sé koz èk in kouyon, mé o pyé d’lo mir i oi lo vré mason. Mézami, souvan dé foi ni sava la foré é ni antann in pti brui d’lo. In rien ditou. In tchitt ! tchitt ! tchitt ! Ni kass pa la tète pou sa. Sof k’in zour, pti ruisso i fé gran rivyèr é néna in débouli dann la montagn avèk in kaskad i zayi toudinkou. Dolo la mète lo tan mé o boudikont li la iz la montagn bien konm k’i fo. Kosa sa i vé dir ? Sinploman ké lé tro tar kan i oi lo déga. La vi an sosyété lé parèye : ou néna konm linprésyon in pti kozman, in pti lidé, mil foi répété, par bann milyé d’moun i fé pa arien é oila k’afors répété toulmoun i fini par kroir é sé konmsa souvan défoi, i shanj in sosyété. Dousman, dousman, oté ! Alé mi kite azot rofléshi la dsi é ni artrouv pli d’van. Sipétadyé.