Médame zé méssyé, koze èk mwin sé koze èk in kouyon, mé sé o pyé d’lo mir k’i ou lo masson. Mézami, mi koné pa zot, mé mwin néna in n’afèr mi yèm pa sé domandé. Néna demoun lé pa jéné d’sa, mé mwin lé konmsa. Pétète par orgèye ! Pars domandé sé mète aou an pozisyon d’féblèss. Pou koué ? Pars si wi sava domandé, sé pars ou na poin é mi yème pa sa. Si tèlman k’in zour mwin lété a d’mandé si mwin noré pa fini volère... Lo mank kouraz la kal amwin dann in lantropriz mwin té i oi amwin bien. Volèr dann in sanss mi admire ali, pars li lé pa fèb-dizon li tranb pa dovan graton… finalman dopi étan pti mwin té i yème pa domandé pars mwin néna l a krintiv la réponss. Mi yème pa domandé mé mi profère réklamé si mwin lé dann mon droi. Finalman dizon konmsa mèm i komanss lo rovandikassyon : sète-la mi pran ali konm in onèr, pa konm in kolaborassyon d’klass. Alé ! Mi arète tèr-la pou zordi avèk in sinp rapèl in kozman zot toute i koné bien, in kostime i sava pou déssèrtin, mé i sava pa pou mwin. Alé ! Ni artrouv pli d’van, sipétadyé.