Zordi bann mèr lé amayé i prétan, domoun lé an poundiak dovan zot biro, manièr i di, i atann sak lo mèr la promèt a zot dopi mwa d’mars. Bin la promèt a zot kiswa in travay, in térin pou konstri, kiswa in kaz, kiswa inn ti sokour osi é la zot i atann boush anfariné shakinn. Mwa d’mars an plin dann fé, mon gramoun, avan tourn lo do i anvoy komisyon pou mwin i di konm sa pass pou kozé si zéleksyon. Mi mont é la li fé asiz a mwin é li koz : « Aou lonm, mi koné ou lé dann fé, pou otan, mi vé pa antann di ou la promèt in n’afèr in moun si ou gingn pa tonir, mi prétan pa sa, ou koné la sityasyon lé dir, sirtou alé pa anbèt domoun, alé pa fé krwar a zot nwar pou blan. Apré li di a mwin èk son zyé plin la malis « an minm tan si ti promèt pa, lé sir toué sar pa éli »

Pou li odrémié pèrd zéléksyon plito rodovwar d’moun si pou pa péyé. Sanm pou mwin, pa tout la fé konm sa, in pé i anfoudsa la promèt tankipé, vot pou mwin zordi mi okip lo rèss domin é la, rod a zot i trouv pi. Mon gramoun touzour la i di a mwin osi, poukoué fo pa promèt ? Boudikont, promèt domoun sé in pé konm si ou frod é la li ésplik a mwin koman lontan té i frod koz pa koman. Pa lo minm manièr frodé, lontan té plis dann la violans, té i bour lé zirnn, té fé vot lo mor, té étinn kouran moman dépouyaz, zirn té i pèrd dann shomin, tousala. Lontan té pa fasil pou tyinbo biro té falé an awar la pongn. Zordi frodaz lé plis an kashièt, lé plis an misouk vik la lwa i vèy osi in pé, mé pétèt minm lé ankor pli pir kavan manièr i fé. Lé plis an d’sou, i profit si la misèr d’moun pou anbèt a zot.

La, zordi bann mèr lé plis an difikilté, sanm pou mwin gouvérman i donn arpa lo kont larzan i fo, i mank in takon i di, é pi la frans lé in pé si l’ki osi. Mi krwa tanto banna i sava Pari pou kozé, tou lé zan i sava la ba, néna in gran rényon, in gran kongré pou sa. Pou gingn pèy zot dèt, sak zot la promèt, pétèt sé lo moman pou zot raminn inn ti n’afèr isi. Sanm pou mwin i sifi pa solman pléré, i saji pou in kou tout i tir dann minm sans, fé in domann kominn.konm i di, domandé lé pa défandu é rofizé lé pa batu !