Sa in kozman mi antann souvan. Dizon, sa in kozman pou amontr la solidarité dann famiy. Dann famiy ini, pars si la pa ini, la plipar d’tan ou i antan souvan demoun l’apré krétik z’ot famiy. I fo dir osi, in provèrb, konm zot i koné na son kontrèr. Konm nou l’apré anparl lo provèrb moin la mark an-o la, ni oi déza lo sans so kozman : sans prop, mé sirtou lo sans figiré pou dir anou konmsa, la pa tout vérité lé bone a dir sirtou si sé raport out famiy, mèm out bann dalon, out kamarad. In sèrtin ségré, sa sé in n’afèr k’i bote amoin pars konm k’i di, la parol lé an arzan, lo silans lé an or. L’or lé pli valab ké l’arzan sa ! Kosa zot i anpans ? Arien ditou ? Fé travay z’ot koko ! Fé bouy z’ot matyèr griz ! Zot va oir ké, rant-rant, ni pé z’ète, tazantan, dakor rantre nou.