Médam, mésyé, la sosyété, mi pans, konm moin, zot i koné bien kozman-la. An touléka, bann léktèr témoignages, kulturé konm zot i lé, moin lé sir zot i koné sa. Sa i ramenn anou dsi lo poinnvizé la solidarité familyal. Dann la lang bann fransé i di : « Linz sal i lav an famiy ! » é isi shé nou La Rényon lé konmsa galman. Si zot la fine alé tribinal pou suiv in prosé moin lé sir zot la fine romark konm la famiy lé movèz foi : èl i kroi sak lé lo pli inkroiyab, é èl i kroi pa sak i diré lé évidan… Romark bien la solidarité sé kant mèm lo dèrnyé protéksyon pou sak néna pi protéksyon… Mi rapèl in madam, èl l’avé in frèr é frèr-la té lo pli gran fi d’gars l’avé dsi la tèr ébin, figir azot èl téi trouv touzour in l’éskiz pou li. El téi di demoun la antrenn ali - l’antrènman d’moun ! El i di ankor li lé akizé a tor, patati-patata. Souvn défoi, la vérité lé pa la sa biensir. Alé ! Mi kite azot rofléshi la dsi é ni artrouv pli d’van. Sipétadyé !