Kozman-la, ni koné ali dopi lontan é son sans prop la pa tro bézoin pou ète dékodé dopi A ziska Z sirtou dann in tan la grèss té in kondiman inportan dann nout sosyété. Zot i rapèl lo tan l’avé poin luil pou gaté é tout kalité l’akomodman té i fé avèk la grèss ? Donk lété pa pridan lèss lo shat tousèl avèk la grèss é konm téi di souvan défoi : « Alé pa amontr lo shat pou vèye la grèss ! ». Astèr, kèl sans i fo donn in kozman konmsa ? Dabor son sans prop ni sort oir mé konm zot i konpran sa lé déza in pé dépasé. Epizapré dizon i fo pa ou lé tro naïf pou lèss sak ou néna d’inportan sou kontrol lé zot pars ou i koné pa lizaz sète-la i pé fèr. Dizon in n’ot sans vi k’sa lé a la mode koméla : konfyé pa lo bien piblik, sansa lintéré zénéral rant la min d’moun i mérite pa. Alé ! Mi kite azot rofléshi la dsi é ni artrouv pli d’van. Sipétadyé !