Zélékssyon prézidanssyèl i rovien l’ané proshène é bande kandida i pouss konm shanpignon apré la plui. Shakinn i san son kor, mé oboudikonte nora inn solman pou rante lélizé. In drol dé mandatire kant mèm, mé li fini l’ané k’i vien : in pé va di sink zané pèrdu pou lo péi.. pou déssèrtin kan zot i di sa, sé pou La franss, mé mwin pèrsonèl kan mi di lo péi, mi vé anparl La Rényon.

Shakinn néna son patriotism . Si mi rapèl bien in kozman in gran bonom noute listoir téi apèl Robinet de Lassèrve, sète-la téi di li néna dê patri, inn sé la franss é l’ote sé La koloni é si mi rapèl bien sa lété pa in kozman anlèr pars issi La Rényon li la konbate konte bande zanglé dann in guèr in zour i fodra ni anparl, é laba dann la franss(nou lété lé zané 1814- 1815) li la konbate bande péi l’avé alyanssé konte Napoléon. Aprésa li la rotourn dann péi bourbon é li la la lite avèk son bande dalon bande fran kréol pou gingn sak ni pé apèl in promyé lotonomi (mé i fo ni oi sa ansanb).

Astèr nou bande lotonomist rényoné kossa ni pé panss de sa ? Mwin mi sava pa di la mère patri, pars mwin lé in pé déssu dsu la manyèr gouvèrnman la franss, gosh konm droite, la okipe lé zafère nout péi(La Rényon biensir !) san konté son politik an déor : mi trouv gouvèrnman la pa pèrmète anou fé avanns noute péi konm nou té i vé. Mi kontèste pa sak la fé d’bien mé mon rogré lé infini pou sak la pa fé :an promyé nou laté anpèshé fé noute dévlopman ékonomik.

Mi rapèl in kozman Mélanchon kan li téi di :Bande rényoné i koné bien sak i fo fé issi la Rényon.Tanka Mitterrand li téi di, an parlan La Rényon, sé in nassion apré éné. Mi rapèl galman parti kominist franssé kan li la pran parti pou noute lotonomi é sa i romonte l’ané 1959…Mon gran rogré sé ké bande gouvèrnman gosh konm droite la fé in réjyonalizassion solman, san bouskil lo réjime néo-kolonyal é pa in pouvoir pou pèrmète anou komande anou par nou mèm. Si tèlman ké nou la pèrde lo tan- ni sorte pèrde pliss dizan- é zordi ankor lé difissil pou nou pou oir lo boute la tinèl pou trape noute vré dévlopman.

Justin