Yèr soir lékip la frans la kroiz avèk lékip Nizérya. Kisa la gagné, L’èr moin l’apré fé mon modékri, mi koné pa é tout fason moin la pa madam solèye donk kont pa dsi moin pou dir azot lo rézilta épi la pa in késtyon tro inportan pars footbal sé in zé, konm néna in bonpé zé. Lé vré sé galman in biznèss é mi pans inn dsé zour moin nora lokazyon di mon dé mo la dsi… mé pa zordi.

Alor pou kosa mi fé in modékri la dsi ? Néna d’ot sizé lalktyalité ! Néna dé shoz lé pli inportan ké sa ! Néna bann sizé bien dramatik, sansa bann sizé i angaz l’avnir désèrtènn réjyon, mèm l’avnir lo mond antyé. Fotball non ! Mé kan ou i parl fotbal ou i pé pa gnor bann vilin défo désèrtin moun néna é an parmi bann défo lo raisis désèrtin éspéktatèr.
Dann lékip de Frans néna d’moun noir, é demoun normal na poin arien pou arproshé la dsi-dann lékip fotball bann bononm lé konmsa galman - épi lé vré pou in bon pé péi i partisip la koup di mond… Dann lékip de frans bann madam néna in moun i sort zantiy i apèl Wendie Renard é madam-la la pa tro loin trap bann méyèr zouèr di mond. Tanmyé pou lékip de Frans é tanmyé pou tout de moun sak lé mélanj-mélanjé, métiss-métissé.

Mé oila, dann bann match madam - la i zoué néna in pé bann vorien la fine pran l’abitid krétik aèl, émite lo kriyé bann jako kan èl i toush balon épi sort tout kalité la kouyonad i di plis dosi z’ot sèrvo an pti grin poi ké dsi lo talan Wendie Renard. Son talan, li lé bien réèl. Son bann kalité fizik, zot lé bien la é si lékip de frans i réisi bien avans dann la koup lé par in fiy konmsa épi konm d’ot néna in bonpé talan kisoi blan, kisoi noir, kisoi sinploman kréol métissé. La Frans la pran son tan pou fé in bon lékip é final de kont èl néna son bon lékip.
Mé oila, balon lé ron pou toulmoun épi momandoné i pé gagné konm pèrd é tanmyé ké lo rézilta l é lé pa ékri par avans, : sé la loi d’fotball. Sak i rogard fotball nora sirman Valérie Gauvin dann zot kèr épi zot pansé, nora Wendie Renard é tout lo lékip i ramas pa lo mou kan zot lé dsi térin. An parlan bann demoun rasis zot va kontinyé ète rasis vi ké zot lé konmsa mé domaz pars sa va fé pass azot a koté bann zésploi so kou isi sé bann madam i sava fé. Domaz pou zot é pou zot san konprann é pou zot kouyonis i rann azot asé bète pou mash la paye kann - an fransé i di asé bète pou manz lo foin.