Mi pans, se matin bann pétrolié i doi bien rir dann zot barb, vik le pri lésans la bès arienk sink santime leuro, é pou aranz lo zafèr, zot na poin lobligasion pou ésplik sa bann konsomatèr... Zot i doi bien rir an misouk kan zot i oi méssié préfé i pran azot an pitié, i fé atansion pa tro dégonf z’ot pla, épi i anpar azot kont bann konsomatèr.

Pars figuir azot, sé lo préfé k’i ésplik, k’i di konmsa zot nana ankor lésans zot la ashté shèr, la valèr leuro la bésé par rapor le dolar, épi le sistèm lé supèr, vik li niabou pa tro goumanté kan lo pri lo baril i goumant in bon pé, pa tro diminié kant lo pri le baril i diminié bokou. Dizon zot lé pa oblizé rakont demoun tout balivèrn, pass tout kalité la pintir, boush lé zié d’moun par zot mèm, vik na inn i fé zot plas.

Toulfason, sé pa dir la vérité k’i kont, sé pa bien éspliké k’i fo. Moin la fine romarké koméla, la kominikasion sé fé sanblan éspliké san éspliké pou vréman, an ésplikan in pé. Mèm si pou sa, i fo sharj de lo, rakont in krak, ramas mantèr.

I prétan dir, lavé in zour in pantin. Li té i apèl Pinocchio. Kan li té i ramas mantèr, son né té i grandi. Domaz banna la préféktir inn-dé lé pa konmsa. Dan la min bann kapitalis, dizon zot i fé in pé lo pantin, mé zot né i alonz pa : sak lé pti i rèss ti ! Sak lé gran i rèss gran ! Sak lé an patat i rèss an patat ! Sak lé an konbava i arèt an konbava ! Moin la fine bien avéyé !

Justin