Matant Zélida la ékrir Justin :

Mon shèr nové, mon spès salté, rouj-de-fon dovan l’éternité, vi pé dir amoin pou kosa bann rouj i di pal lo mèm z’afèr ké lé z’ot ? Pou kosa zot i anparl dé shoz i diré i intérès pa lo moun normal. Sak pou d’moun sé l’aktyalité i diré pou zot sa i égzis mèm pa ! Zot i pass la dsi konm lo dsi fèy sonz ! Tok, pran sa pou toi !

Justin la fé pou répons :

Mon vyé matant k’i koz touzour la boush rouvèr, i étone pa moin antann aou dir in n’afèr konmsa mé mi pans pa ou na rézon pars kann, sé in problèm sé pa in problèm ? Shomaj, la povrété, l’ésploitasyon i fo anparlé i fo pa anparlé ? La guèr sé in problèm sé pa inn ? la dominasyon bann gran péi ? Ni s’anfoutsa ? Nout l’avnir, sa i intérès pa nou ? Mi pans plito bann dominèr épi z’ot konplis i aral l’opinyon dann in sans lé pa danzéré pou z’ot dominasyon ! Tok ! Pran sa pou ou.

Matant Zélida la arvir ali :

Alor mésyé lo rézonèr, ou i pé dir amoin kosa sa i ansèrv anou konète la tèr i réshof, la glas i fonn dann sépa konbien lo tan, si zordi moin na poin in kari pou mète o fé ? Pran tuzour sa !

Justin la réponn ali :

Matant domin avèk apré domin sa i prépar zordi. Si ou la pa fé sa, ou mèm sansa bann zénérasyon k’i vien va mord z’ot doi . Pou sa i fo in pé i sonn l’alarm mèm si sa i fé pèr anou vèy pa koman. Gouvèrné sé prévoir ! Gouvèrné zyé boushé la pa bon ditou. Tok ! Pran sa pou ou !