Si sa i di azot kékshoz zot i pé akout la radyo épi rogard télé asoir. Moin lé sir, konm shak ané, an lé riskab an avoir in radyo trottoir. Dann radyo trottoir-la va domann demoun si zot i koné kosa i lé katorz zilyé, ki la fé koi zour-la, pou kosa banna la désid mète la fète nasyonal zour-la.

Lé inportan ! Dizon sé in l’okazyon pou konète in pé listoir La Frans… in pti guiguine mèm pars lo program listoir dann bann klass primèr, sansa dann bann klass kolèj i done pa ou pou gaté. I done pa ou pou vréman konète listoir épi la kiltir in gran péi konm La Frans.

14 Zilyé 1789, lo pèp parizien la prann la Bastiye, in shato prizon sinbol l’inzistis, lo bann privilèj épi tout sak bann révolisyonèr parizien la fout atèr dann in zourné. Sète ané-la, la vote lo déklarasyon bann droi de l’om épi bann sitoiyin, in gran progré dann la rokonésans bann gran prinsip konm la libèrté, l’égalité épi la fratèrnité. La rokonésans bann gran prinsip konmsa ?

Oui, mé pa partou. Dann bann koloni l’avé ankor lésklavaz é lésklavaz lé loin d’ète in rokonésans bann gran prinsp la. 14 zilyé 1789 la pa shanj arien pou nout bann z’ansète é nou la mèm pa toush in promyé pyèr la bastiye. Pou nou 14 zilyé 1789 la pa aport anou arien :

Landomin, zésklav té zésklav, zésklavazis zésklavazis, la réréprésyon la rès la réprésyon… Pou kosa mi di sa ?

Dabor pars i fo ni koné nout listoir é nout kondisyon kan dan La Frans té apré fé la révolisyon. Epizapré i fo ni mézir la distans l’avé rant bann fransé d’ Frans épi nou... Lékol i amontr anou sa konmsi la-ba lété isi é isi lété la-ba. Poitan non, san foi non.

Domin katorz zilyète sa lé vré, sa lé inportan. Dakor, mé i fo ni koné nou la atann 70 z’ané pou k’i aboli lésklavaz shé nou. Nou la atann ankor près san z’ané pou la loi dsi légalité é anplis la pa aplik tout suit-nou la atann ankor sinkant z’ané... Nou la pankor rant dann lo prinsip la résponsabilité. Tanka la fratèrnité, ziska zordi sé in trik marké dovan la méri. In poin sé tou.