Demoun lé abityé dir, lé difisil ramass larzan, dépansé lé fasil. Sa lé byin vré ! Koman-koman, pou ramass larzan, i fo ou i priv aou déssi kékshoz, i fo ou i évite fé déssèrtènn dépans. Lé dir priv aou déssi in n’afèr zordi pou gingn ashté in n’afèr domin, k’i koute shèr, épi k’i korésponn byin in projé ou la déside amène o-bi.
Sa lé vré pou in partikilyé. Sa lé vré galman pou in koléktivité, pars larzan, sa i trouv pa déssou la pate shoval é out z’administré i pous aou a dépansé, ashète sosi, ashète sola, donn sibvansyon. Mèm, out bann dalon z’éli, lé riskab dir aou, armass pa larzan, dépans ali, pars konmsa demoun sar kontan èk ou… domoun va vote pou ou…
Ala koman, dann kèl kondisyon la Réjyon la nyabou ramass larzan pou fé la MCUR avèk in l’ède l’État épi in l’ède l’Érop. Solman oila ,lo nouvo prézidan, Bogoss promyé, la déside pi fé nout zoli mézon. Pou fé kossa ? Pou fèr in kékshoz itil, k’i dir, k’i aviz konm di lo konte lo moiyin tèrm sansa lo lon tèrm.
Non va ! La déside ashté lordinatèr, in marshandiz non dirab par l’fète, épi ranplas lo l’État dann la mobilité. Dé tan, troi mouvman, i poz zéro, i rotyin toute va fini la ras lo larzan ramassé. Bin domin ? Va oir sa pli d’van. Domin sé in bèl ome !

Justin