Mézami, domin zour d’lan shinoi. Myé k’sa domin i komanss l’ané d’lo tigr é sak lé né dsou lo signe-la i paré zot néna la shanss pou vréman. Pou koi ? Pars l’ané la sé sète lo tigre dolo ki di tigre di forss, di galman mouvman, abilté. Mé sé ossi in l’ané d’révolte, in l’ané d’robélyon épi sète in bonpé shanjman de moune i atande pa.

Alor kossa i sava arivé ? Boudikonte mi koné pa vréman pars mwin la pa in lastrolog shinoi. Mé si mi ziz par lo bande kontradikssyon néna dan lo monde, si mi rogarde bande rapor d’forss d’issi d’laba, mi pé dir sré pa étonan l’ané lo tigre dolo lé riskab aporte anou in bonpé sirprize in pti pé partou dsi la tère.

Mé la pa sa solman, kan ni oi zour d’lan shinoi i ariv, mi panss i fo ni konsidère bande shinoi la Rényon avèk réspé, pars mèm si banna té pa tro nonbré dann la popilassion noute péi, mi trouv zot la fé in bonpé zafère issi. Zot la aporte zot pyèr pou la konstrukssyon lo pèp rényoné.

In provèrb pou drèss kabar an poin final ? La pa toultan la fète shinoi ! É lé bien vré pars bande shinoi téi travaye tou lé zour, sof lo zour zot zourd’lan. In sèl zour d’konjé shake ané ! Sa i fo pa obliyé… Bone ané toute bande shinoi dsi la tère ! Bone ané noute bande konpatriyote shinoi. Bone ané toute bande rényoné.

Justin