« Domin solèy va lévé ! », « Domin lo zour va kléré ! » – in kozman pou la rout

Ala in kozman mi èm. Ala in kozman la marsh koté moin tout mon vi, é i kontinyé akonpagn amoin dan la vi… Mi koné pa zot, mé moin mon vi lé marké par in kantité z’afèr pa bien gayar ké ni pé apèl kanikrosh. In kanikrosh sé kan lé shoz i marsh pa konm ou i vé, kan in lanspèk ou la pa prévi i kal aou dann out shomin pou trap in poinn vizé.

Sa sé in n’afèr lé vré dsi lo plan pèrsonèl : kan ou i sèy fé in kékshoz pou ou, pou out famiy…in bon kékshoz ! In bon l’obzéktif konm i di é ou i gingn pa trap ali, ou i di : « Domin solèy va lévé ! », « domin lo zor va kléré ! » é sa i donn aou la pasyans atann. Mé sa lé vré kan ou i sèy fé in n’afèr pou… dizon out péi. Kan ou i vé li marsh an avan olèrk kil an aryèr. Kan ou i fé in pa an avan, ou lé kontan ! Kan i fé dé pa an aryèr, la tristès i mont dsi ou. Ou la anvi révolté, mé ou i domann si i fo révolté osinonsa i fo avans avèk d’ot moiyin, avèk in n’ot manyèr, dann in n’ot shomin… An atandan ou i di : « domin solèy va lévé ! », « domin lo zour va kléré ! ». É sa i donn aou la pasyans pou arpran out marsh an avan in n’ot manyèr, in n’ot fason, in n’ot métod…

Kosa zot i anpans zot ? Arien ! Mé, fé travay z’ot koko, fé bouy z’ot matyèr griz é zot va oir si rant-rant nou tonm pa dakor rantre nou.