Mi domann a mwin si sak la fé lo zétid linnsé la, la déza viv inn ti néstan la Rényon. Banna la rann piblik in rapor d’si la shérté d’la vi dann bann départman loutromèr donkalor an parmi néna in kolonn pou nou la Rényon. Sanm pou mwin sak la fé lo létid, kiswa li la fé an gro-an gro, kiswa li rod pou taz a nou, ou kiswa li na maloll dann zié. Si ni akout a zot, la vi la Rényon i kout aryink sèt pour san pli shèr k’déor.

Odrémié antann sa kèt sour. A lèr d’zordi, sak néna lo zié pou war, sak néna inn ti pé konprénur, kiswa èk internèt ousinonsa kiswa èk la famy laba déor lé pa tro difisil pou konèt lo pri é apréla konpar èk isi. Mi domann a mwin pou kisa bann moun linnsé la i roul ? Sanm pou mwin lo létid la i tonm in pé boukou apik. Mi antan tout zabor, néna i di, domin kan ni rant, na koup isi, na koup laba, na fé 400 million lékonomi.

Mi pans pou vréman sé in manièr pou amay a nou. Konm si pou zot, vo mié komans tou-d-suit prépar lo térin pou tanto, vik linnsé, boudikont sé in zorgann ofisièl é li di konm sa d’si la shérté d’la vi rant nou é déor lé égal-égal, donkalor pa bozwin pous pli lwin. Mon dalon èk ki mi rofé lo mond tanzaot, i di a mwin konm sa “Lontan lavé la sinn pou amar nout pié, konméla néna domoun i rod pou boush nout zié“.