Bann z’oksidanto, gran foutèr d’ dézord dsi la tèr, la pankor fine oir tout déga zot la fé kan zot la parti fé tonm lo réjime libyen épi tyé son prézidan Mouamar Kadhafi… Mi pans zot i souvienn sa konm si lété yèr, kan bann z’aviyon fransé, z’anglé, épi z’amérikin la parti mitraye dann La libye, pou soidizan, donn in kou d’min la démokrasi.

A ! Bien antandi Khadafi lété pa in l’anj gardien ! Biensir, son réjime lété pa in réjime démokratik ! Biensir la popilasyon téi san lo pou lo mank démokrasi. Mé lo réjime l‘avé plizyèr kalité. Inn é pa lo pli féb, lété d’fé règn la pé dann lo péi, anpèsh bann z’intégris mizilman fé z’ot wati watya dann péi banna. Arzout avèk sa lo gouvèrnman l’avé nyabou anpèsh bann migran alé travèrs la mèr pou rant dann l’erop. In bon rézilta, si ni konpar avèk sak i fé koméla.

Sak i fé koméla ? lo péi lé divizé. Bann tribi i bataye inn avèk l’ot. Bann jenn z’afrikin, la arkomans sort dann z’ot péi l’afrik Noir pou alé dann l’erop. Mé dann lo péi nana in bann tribi bandi é souvan défoi i trap azot ; aprésa zot lé blijé rashète z’ot klibèrté é si zot na poin l’arzan i vann azot o zansèr konm téi vann zésklav dann tan la trète.konm téi fé isi épi dann in bonpé péi.

Pandan s’tan la, kosa tout lo bann foutèr d’dézord konm La Frans, l’Anglétèr, l’Amérik i fé ? Arien ditou, zot i lès la vant o z’anshèr é zot i tir pa zot solda bien ékipé, z’ot zarm i koute par milyon, z’ot l’aviyon, z’ot fizé, pou sokour bann jenn z’afrikin. Zot lé pa la èk sa, in poin sé tou ! Provi ké bann z’ésklav la pa bann éropéin !

Sa i apèl pa in konplisité d’krime de guèr sa ? Si la pa sa, i arsanm bien touléka.