Médam zé Méssyé, la sosyété koz èk mwin sé koz èk in kouyon mé sé o pyé d’lo mir k’i oi lo masson. Mézami mi sipoz konm mwin é pa arienk in foi demoun-pétète mèm zot famiy-la mète azot an gard dsi zot féblèss, dsi zot fassilité pou dir oui é zot kazi-inpossibilité pou dir non. L’èr-la mi pans zot famiy la du dir azot sak lé marké an-o la, sansa la sort azot bann kozman konm : I done in plass pou rakokiyé, épi i pran tout la plass boudikont. Alon kalkil ansanm, kossa lé pli valab ? Doné sansa rosovoir ? Sa i dépann lo moun : néna in pé i yèm di non, d’ot pou di non, touziss si zot i rant pa dsou la tab. Anfin shakinn i oi midi dovan son port. Shakinn i désid la fasson li doi konport ali dan la vi. Sèl zafèr, mi panss i fo fé antanssyon : antanssyon bann zabizèr. Pou lo rèst sa i roul ron. Alé ! Mi kite azot rofléshir la dsi é ni rotrouv pli d’van. Sipétadyé.