Zot i koné kossa i lé in pyé, zot i koné ossi kossa i lé lo karo. Antouléka zot i koné inn é l’ote la pa parèye ditou : dann in karo néna bonpé pyé é si la done aou in pyé, la pa di aou pran lo karo.

I paré ké dann tan mon papa l’avé in bonpé zoinalyé é li l’avé galman in gran karo manyok. Donk apré lo travaye, bann zoinalié téi réini pou zoué karte é kan téi ariv tar mèm zot l’avé fain si tèlman ké zot téi rash maniok — pa rashé pou d’bon, mé téi koupe lo maniok dann trou — épi zot téi fé in bouyé avèk dosik karamélizé par préféranss.

Mé oila, lo maniok koupé sa i ropouss pi, si tèlman ké kan mon papa la vouli rékolt son manyok, l’avé kaziman pi. Li la rante dann in kolèr blé mé kan lé fini lé fini, lé bien fini. Avan l’èr la pa l’èr, apré l’èr la pi l’èr é mi kite azot rofléshir la dsi. Ni artrouv pli d’van, sipétadyé.

Justin