In pyé avèk in karo, sa la pa lo mèm z’afèr. In pyé pistash avèk in karo pistash la pa la mèm shoz, konm in pyé kann avèk in karo kan. Kosa sa I vé dir ozis ? Sa I vé dir na désèrtin moun I ariv pa kontant azot avèk sak i donn azot, sansa avèk sak i lès azot fèr. Si ou i pran pa prékosion, i mont dsi out tète, é san tardé ou lé pi shé ou : i réspèk pi out domènn privé !

Lo problèm ? Shakinn i donn son prop sans sak i apèl lo domenn privé. Désèrtin i donn in sans larz : donk lo moun i pé fèr in pé sak li vé par raport a ou. Pou d’ot, lo sans lé étroit vèy pa ! Par raport a zot, ou i koné pi kosa ou i pé fèr é kosa ou i pé pa san malkontant ali. Na mèm in pé i shanz zour pou zour : zordi ou i pé fèr tèl shoz, domin non, apré d’min oui. Kotoaye azot i vien in problèm san solisyon ! Pli pir k’in gran zékouasion matématik.

Kosa zot I anpans ? Arien ditou ! Fé travay z’ot koko ! Fé bouy z’ot matyèr griz ! Zot va oir ké rant-rant ni pé z’ète dakor rantre nou.