Mi trouv, lé bien rékonfortan oir in pé partou bann santral solèr fotovoltaïk : kisoi déssi parking bann sipèrmarshé, kisoi déssi bann toi magazin, sansa déssi la kaz bann partikilyé ; Mi oi sa konm in viktoir lintélizans déssi la bétiz... konm in sinbol lo dévlopman dirab. Pars konmsa, l’imanité i fé pa arienk gaspiy lénèrzi lé antassé dann la tèr dépi sépa konbien milyon l’ané, konm pétrol, konm gaz épi konm sharbon. Pars an atandan k’i gingn stok lo gaz karbonik san danzé, lénèrzi ronouvlab sé kant mèm lo méyèr moiyin pou lite kont l’éshofman lo klima.

Solman, moin lé in pé amèr kan mi antann dann radyo épi kan mi oi par moin mèm lo bann z’ouvriyé l’apré monte so bann santral fotovoltaïk, la pa bann marmay la kour, la pa bann Rényoné. In zour, moin la antann in moun l’apré domandé, dann radyo, si pou gingn travay la-dan i fo an avoir Bak+ sépa konbien. Mi koné pa si partou lé shoz la spas konmsa, mé d’apré moin, dann bann gran santral, la pa anbosh bann Rényoné toultan. Mi trouv lé égoïst fèr in n’afèr konmsa. Nana kant mèm 147.000 pèrsone lé marké dann Pol anploi, é moin lé pliské sir, nana in bonpé Rényoné lé kapab fé sa.

Solman, afors fèr konm si bann Rényoné lé pa kapab fé si, lé pa kapab fé la. Afors done demoun déor l’anploi dann désértènn fonksyon piblik, ala lo rézilta. Na défoi, moin lé a-dmandé si sa la pa in manyèr pou arkoloniz anou, épi mète anou dann la kondisyonn asisté... frodèr z’alokasyon, ramasèr d’mou, pli kapab alé rode tout bann z’ède plito ké transpiré pou gingn son sosso. Oplis i sava, oplis lo tan i pass, oplis lo mo d’ord la CGTR i aparète amoin vré. Lo mo d’ord ki di konmsa : « Donn Kréol travay ! ».

Justin