Ala in n’afèr sinp é ala in n’afèr vré. Kosa sa i vé dir ojis ? Sa I vé dir I fo pa alé kont son z’intéré. Dann kèl ka ni pé dir sa ? Par égzanp : in moun na in travay a-titré. Li na intéré bien fé son boulo pou konsèrv son plas travaye... Mé si li amenn sa an sharète shaviré, Li lé riskab pèrd son gingn-pain. Ni pé an avoir d’ot z’égzanp : konm bien soign son vash pou k’èl i done de lé konm k’i fo… Mé, dé foi, kan i di sa sé konm in lashté, pou flate lo patron é bien fé pass aou, pa solman par lo travaye mé an fézan lo lésh-bote-blouz. Sa i ariv dé foi malorèzman. Bon ! Mi lès azot kass z’ot tète la dsi é ni artrouv pli d’van.