Oté

« Donn pa out shat pou vèye la vyann »

In kozman pou la rout

Justin / 20 zwiyé 2018

JPEG - 43.6 ko

Ala in kozman pliské rézonab pars si i fé sa zot i koné kosa v’arivé. Lo shat va fini par pans la vyann lé a li é konm, d’apré moin, zot na poin lo sans la propriyété dé z’ot, zot va komans par tir z’ot par la dan. Sa la pa vré arienk pou lo shate, sa lé vré galman rant le moun. Té i di pa, dann in tan, désèrtin moun té i vien shèrch lo sal la kantine épi té i obli pa mète inn-dé bon morso la vyann dédan. Fé koz inn-dé pèrsone la travaye dann mézon dann tan : zot téi di pa zot i vol, zot téi di zot i pran. Myé k’sa zot téi di sa sé lo pèyman pou z’ot kouraj. Alé ! Mi kite azot rofléshi la dsi é ni artrouv pli d’van. Spétadyé !