Pou bannzil Chagos néna d’in koté la Répiblik Maurice k’i domande lo rotour lé chagos dann son souvérènté é d’in n’ot koté néna Langlétèr (GB) ki vé pa antande la rézon, k’i vé pa antande la loi intèrnassyonal, mèm bande zinstitissyon intèrnasyonalkonm l’ONU k’i domand lo sinple rotour dé shoz dann in orde internassyonal lojik. Arzoute avèk sa an pliss lo maléré sor lo pèp shagossien.

Pou bande zil zépars néna la pozissyon lojik noute grande voizine apiyé par bande loi intèrnassyonal, épi l’ote koté néna La franss tète dir k’i konpran pa k’i fo rotrouv in orde lozik intèrnassynal.

In késtyon d’intéré ? Mi panss mèm pa pas ni GB, ni La franss i tir in lintéré bien konpri dann zot okipassion ilégal bande téritoir miniskil… mé lé vré avèk loséan k’i antour azot épi bande rossours maritime épi minéral sirman pa a néglijé. Koman lé shoz l’ariv konmsa ? Koman in négossyassion dsu lindépandans pou Moris konm pou Madagascar la done in si mové rézilta ? Koman Moris zordi Répiblik épi Madagaskar k’i kriye kont linzistis zordi la fini par ète dakor, momandoné, avèk in solissyon téi réspèk ni zot zintéré ni zot souvérènté.

Astèr ni koné sak i éspass : ni oi bien koman Langlétèr avèk son gran konpliss amérikin d’in koté, La franss l’ote koté lé inn é l’ote anmayé dann in sityassion provizoir parétil mé dann in ka i fé si tan tèlman mal noute bande frèr é sèr shagossien(ne)… éparpiyé rante Moris, Sésèl, épi Langlétèr avèk in manke réspé total son droi d’rotour dann son péi natal.

A bon ékoutèr, salu.

Justin