Na poin lontan, mi rogard in télé d’Frans. In zournalis in pé pète-sèk lété apré intèrviouv in l’ékrivin té i sorte Ayiti, zis in pé d’tan apré lo tranblémann tèr. Lo boug i komans kozé épi, toudinkou, li anparl la dète lo péi par l’fète l’ané 1825, gouvèrnman la Frans la mète lo péi in for l’amann. Lo pti pète-sèk la sèr la lèv épi la fé konprann lo boug té pa in n’afèr pou dir... la karéman koup son siflé.
Samdi soir déssi Antenne-Rényon, in prézantatris i rakonte — sa lé vré byinsir ! — Nassimah Dindar la réponn in intèrviouv déssi lo site Konsèy zénéral. Alors lo pti donzèl i di, konm in moun i koné lé shoz, vèy pa koman, ké la prézidante i pran pa lo risk fèr-fas in vré zournalis. Dizon, mi konpran madame Dindar, pars dépi la kriz l’ARAST la komansé, la pa mank in zour Antenne-Rényon, konm lé z’ote gran médya, la pa pran parti kont Konsèy zénéral. Alors, alé koz èk banna, sé alé batay èk banna, si i vé byin koz èk ou… é sa, sa lé pa sir ditou. Alors, lé forsé ké sak la poin droi la parol dann bann gran médya i rode z’ote manyèr pèrsonèl pou fé konète z’ot fason oir lé shoz.
In zour moin la di la mansonjri, la pate lé kourte. Sa i vé dir, tardra vyindra, va débisk aèl. An kontrèr, demoun va touzour finir par konète in zour la vérité. Mé oplis pèrsone nora poin l’okazyon di la vérité, oplis sar dir pou konète aèl. Sa ni oi tou lé zour, é dépi tro lontan... dépi k’ti donzèl-la té i rèv pa ankor ète dann vante son momon.

Justin