Byin sir nou lé kapab dan nout péi. Pétèt travay i mank ? Pa pétèt, travay i mank pou vréman, mé la konpétans nou néna zordi, kèlkéswa lo séktèr nou néna pou réponn, tout i rokoné sa zordi, dan tout séktèr nou néna la konpétans, kiswa dann lagrikiltir, kiswa dann lénérzi, kiswa dann laministrasyon nou néna sak i fo pou dévlop nout péi. Arèt taz a nou la d’si, mi défié sak i di a nou lo kontrèr. Dopi lo tan bann lasosyasyon i sobat pou trap légalité dovan travay dan nout péi.

Nou néna in vilin manièr nou, touzour alé rod déor sak néna isi, mé poukoué ? Sanm pou mwin souvan-dé-fwa la pa nou i désid. Konm mi di la bon o, lé vré travay la pwin tro, mé dék néna pou bèk in klé, fé di a nou na fann partou konm sa tout va konèt, sirtou fé pa an kashièt, di a zot byin ni koné tout touzour, konm i di fourmi i marsh sou la tèr domoun i koné. Dék néna in mitasyon dan ladministrasyon doz in pé lo nafèr, fé in manièr i protèz pa tro inn par rapor a lot.

Sanm pou mwin i komans rant in pé dann koko d’moun. Mi sort ékout in prézidan lasosyasyon i travay la d’si zistoman, li di sèt ané li vé brak a li plis kont la diskriminasyon, li vé légalité réèl pou bann iltra-marin, bann mo lé for baya, la pa in boug isi i di sa, in boug déor. Li parl lo rotour o péi bann marmay, li parl pou galiz bann rovni osi. Dopi lo tan nou lé kapab ?