Oté

Dopi plann sirvi ziska zordi nou la fé in bonpé plan pou sèye dévlop nout péi. La pa moiyin di non !

Justin / 23 zwiyé 2019

JPEG - 43.6 ko

Dalone, dalon, zot i koné sète ané sa i fé soisant zané nout parti i égzis é an déor d’li mi pans pa d’ot parti – sinp port klé la plipar d’tan par raport bann parti La frans-la toultan sousyé propoz dé shoz pou nout péi, é pou nout pèp. La plipar d’tan son prinsipal sousi, kan in problèm i poz, sé d’trouv in solisyon é la plipar d’tan lo méyèr posib.
Si tèlman son propozisyon lé bon, kan kisoi gouvèrnan, kisoi bann konsèye zénéral épi rézyonal la voulu alé kont son zidé zot rézilta la plipar d’tan lété lamantab. Mi vant pa, mé mi di lo sinp vérité. Si lé konmsa, lé konmsa é pa otroman.

Mi koné pa si zot i rapèl, sansa si zot i koné, l’ané 1975 dann in konférans éstraordinèr nout parti la propoz in plann sirvi : in plan konplé pou amenn nout péi dann shomin son dévlopman. Mé nou la pa arète la : nou la fé galman in plan konplé pou lo dévlopman an réspéktan l’anvironeman (EDDE)-kisa rantre zot i souvien lo PDA ? Lo PDr ? Kisa ankor i ansouvien lo plan Paul Vergès la travaye dosi dann tan li lété promyé vis-prézidan Camille Sudre lété prézidan.
Dopi 1959, nou la touzour fé konmsi, pou La Rényon, nou lété konm in gouvèrnman dann l’opozisyon é kan nou la partisip la majorité konsèye zénéral épi lo konsèye réjyonal nou la mète an pratik lo bann plan nou l’avé kalkil kan nou lété dann l’opozisyon. Sof, konm lo pouvoir la mank anou, néna bonpé zafèr nou la majiné mé nou la pa gingn lo droi pou apliké. Noré fali l’otonomi mé nou l’avé poin ; noré falu in vré dékolionizasyon mé sète-la nou l’avé poin.

Mé pétète zot va di amoin zot i ansouvien pa ! Zot i an souvien pa pars bann gran médya la pa bate tanbour dsi bann lidé konmsa… zot té la zis pou galvodé. Si tèlman nou té souvan dé foi oblizé pou vanzé pou nout sinp libèrté pou kozé. Mi pans zot la antann parlé d’sa mé tout bann kamarad la mobilizé dann z’afèr konmsa zot i ansouvien sa bien.