Mézami mwin lé sir bande zansien sak la viv dann la kanpagn i koné bien kossa sa i vé dir. Zot i koné poul i dor bonèr. Dé ké lo pti brune i ariv zot i pran zot kartyé pou la nuite kissoi dsu in toi, kissoi dsu in bransh in pé ba. Antouléka, zot i gingn tatane, zot i dor. Mé gran matin sé lo tour lo kok pou aji : li lèv é li fé lèv toulmoune. Sé konmsa la vi i pass dann poulayé.

Astèr lé sir ni parl demoune nou-la, demoune i dor bonèr épi i lèv gran matin. Konm kréol La Rényon dann tan lontan, pars koméla lé pi konmsa : i dor tar épi i lèv bonèr donk apré i manke somèye, i manke ropo é la santé lé forssé li pran lo shok.

Alé ! Mi kite azot rofléshi la dsi é ni artrouv pli d’van. Sipétadyé !

Justin