Li lé dann in boutik é in gro méssyé l’arivé é la domande « inn di pain !  » é kan li té fine gingn son inn di pain, li lé parti é lo komèrssan la di : « Wi koné kissa i lé missyé-la ?!!! Méssyé-la sa in minist dann gouvèrnman Pravind Jugnauth. ». Son konklizyon éstèr : « wi oi bien laba lé pli valab k’issi ! »

Astèr mi done ali rézon épi mi rante dann son zé .Mi di ali : « kréol la fine fé dë zour dan la franss, i fé konmsi zot i koné mèm pi piman : « késs ké sé ké so péti frui rouz ? » épi li krok dedan é bien antandi i poik ali épi li kriye : « Kite ta mèr piman, ti poik for konmsa don toué ? »

L’èr-la li rogarde amwin in pé étoné ;li konpran bien mwin l’apré fou d’sa tète é li domande ali bien pou kossa. Mi lir dann son zyé li konpran pa bien sak i ariv é mi di ali : souvan défoi,demoune kolonizé i panss déor lé méyèr ké shé zot. Zot i di souvan : « A ! bande zantiyé ! A ! Bande zafrikin !  » alé oir noute toute lé ankor abiyé avèk langouti kolonyal. Kolon izé in zour, kolonizé touzour... Mi éspèr pa. Toulmoune i éspèr pa, mé sa in po difissil pou artiré.

Mézami kan la aboli lésklavaz, bande zésklav libéré la mète in sakré boute tan pou konprande zot té pi ésklav. Langajé lé difissil konprande li lé pi angajé. Kan la koloni i trape son lindépandanss i fo lo tan pou vni indépandan. Néna poin inn pou ratrape l’ot.

Nou la konète labolission lésklavaz ! nou la konète la loi départman franssé ! Nou la konète vnir région ! Mé o fon noute roflèks lo passé souvan dé foi li lé ankor la, é pou nou tire so loripo dsu nou,dor tar lèv bonèr.. Lontan mwin la panss kan la Rényon sré otonome, landomin mèm mwin noré santi amwin konm libéré. Zour-la lé pankor arivé ! Kan v’arivé m’a oir ! mé mwin lé krintif sar pa toutsuite konm mi kroi akor zordi.

A bon ékoutèr-salu !