In moun bien i rogrète la mète in moniman zilo zis l’androi bann rédèr i sava débarké. In moniman pou bann zanfan La Kreuz. I parsa lé riskab korsh z’ot zyé.

Matant Zélida la ékrir Justin :
Mon shèr nové, mon spès salté, rouj-de-fon dopi l’étèrnité, néna lontan ou la pa parti Zilo ? Ou la pa trouv arien la jène out vu la-ba ? Non ! Ebin, moin va dir aou kékshoz la jenn amoin é pliské jéné siouplé pars ankor in foi i mète lo doi dsi bann koté noir nout listoir. A moins ké ou, ou lé kontan avèk sa ou, amoins ké ou pèrsonèl épi z’ot parti rouj-de-fon i trouv bien kan i krétik La Frans… Kosa mi anparl ? Mi anparl lo moniman pou bann zanfan La Kreuz. Foutor d’in sor, sak lé déyèr nou lé dèryèr nou é nou la pa bézoin anparl sa toultan. Arète èk sa foutor d’in sor ! Tok ! Pran sa pou toi !

Justin la fé pou répons :
Mon vyé matant k’i koz toultan la boush rouvèr, in kozman konmsa vénan dé ou lé pa pou étone amoin mé sak lé domaz sé ké néna d’ot ké ou, é sirman pli inportan ké ou l’apré bate z’ot mové lang dési moniman la mète laba Zilo pou bann zanfan la Kreuz.
Zanfan rényoné déporté laba dann péi la fré, zanfan séparé d’zot famiy, zanfan robatizé, Zanfan tronpé sa i fé pa zot arien sa. Sa i kont pa sa ! I fo pa anparl sa ! Mèm in moniman i pé pa fé pou zot-amoins ké téi vé bour sa dann in trou parla demoun i oi pa ? La vérité nout listoir i fo pa anparl sa ! Kashyéte amoin so pasé bann moun bien i vé pa voir !
A ! Sa i korsh z’ot zyé ! Sa sé in soufrans pou zot ! Bin la soufrans bann marmaye déporté sa i kont pa sa ? Poitan la soufrans sé z’ot soufrans. Sé zot zanfan zété. Sé zot zanfan déporté é sak i vé gnor sa i gnor, mé nou rényoné ni pé pa gnor sa ditou. In rogré : nou la pa gingn anpéshé. Tok ! Pran sa pou ou !