Mézami, zot i koné souvan dé foi, ou néna linpréssion wi oi pa lé shoze bouzé. Ou néna konm linpréssion arien i avanss pa, arien i bouze pa é opliss ou lé préssé li bouze wi diré li rèss anplass. Pétète ou lé tro préssé, pétète i fo solman pran passyans pars kan wi rogarde in pé an aryèr wi apèrssoi konm lé shoze la shanjé.

In zour, mwin té apré diskite avèk in kamarade déza in pé fatigué é mwin téi di ali, mwin na konm linprèssion dopi ni lite mi oi pa lé shoze avanssé konm ni voudré. Li la réponde amwin konmsa : wi kroi sa ou, mwin pèrsonèlman mi panss lé shoze la fine shanj in bonpé mé biensir i rèss bonpé zafèr pou fère. Mé mi lèss in pé lo tour pou lé zot fère.

Mwin té étoné pars dann tan-la mwin téi oi ali apré lité pou shanj lé shoze, pou li shanj la vi konmsi li l’avé in gran rol pou zoué.L’èr-la li di amwin : nou la fine fère assé, sé lé zot k’i doi fère in pé. Fransh vérité, mi koné pa si li téi panss vréman sak li téi di. Sé pou sa noute konvèrsassion l’arète la. Mwin noré vouli li di amwin néna dé shoze ni pé fèr ankor, kansréti in pti pé é mwin téi vé dir ali :

Pou kapote in galé, i fo la fors, i fo la téknik, i fo lo tan. Wi tourn ali ti-dousman, ti dousman, ziska lo moman la gravité-konmsa même i di sa,-i zoué an oute favèr é lo rosh i déboul d’in kou. Konbien foi nou la fine oir sa kissoi dsi internassyonal, kissoi dann noute réjyon, kissoi issi mèm dann noute péi.in léfor si li lé bien dozé, bien orianté, li pèrmète avanssé.