Mézami, mi panss zot i koné kozman mwin la marke an-o la é zot i koné li konsèrne bande demoune i yème pa tro forssé. Antouléka, lo moune lé konsidéré konm parèss, kan li marsh li kraze pa l’anrobé. Solman oila, mi konpran pa bien i anparl lo shien konm d’in péréssé pars mwin la konète dé shien lété ipèr-aktif. Nou l’avé in shien konm Milou lo shien Tintin — li téi apèl siltan — é mi mète azot o défi d’dir lé té péréssé.

Matin-o soir li téi kour, matin-o loir li ravaz volaye demoune, san konté kalité konba li téi fé soir-é-matin konte lo shien défoi pli bèl ké li. Mèm in zour li la trape in lyèv. Biensir zot va dir amwin néna lo shien konm néna demoune in pé touté kalité : travayèr, paréssé, fran, fourb, krint, la pa pèr arien, m’anfoutsa, bon karaktèr, mové karaktèr…

Sa lé dan la natir é mi invite azot pou rofléshi la dsi é ni artrouv pli d’van. Sipétadyé.

Justin