Oté

Douz-karant ! Mil dé sankarant kilo kann

Justin / 9 zwiyé 2020

JPEG - 43.6 ko

Sa téi éspass dann tan, la plas zordi néna la méri Sint-klotide l’avé in balans kann. Dann tan la koup kann l’avé tou lé zour in santène sharète, pétète plis dann l’androi-la Téi falé oir koman bann sharète-la lété bien sharjé in manyèr inpékab : pou komansé téi ranpli la kèss avèk bann paké kann alonzé inn koté l’ot. Apré sa téi mète bann paké kann dsi la gosh épi dsi la droit, vèrtikalman, épizapré téi ranpli la kèss touzour vèrtikalman méin pé évazé pou la parti vèrtikal. Si zot i vé rogard dsi l’internet é zot va oir koman sharjman-la lé zoli.

In sharète konmsa, bien shar jé téi pé transport ziska mil sink san kilo kann.-Moin sharjé téi falé kont mil dë, mil troi san kilo san par-la. Shak sharjman lété pézé, épi téi tir la tar é aprésa téi mark lo tonaz nèt dann in karné é sa téi sèrv pou pèye lo plantèr. Pars dann tan-la téi pèye kann o poi, koméla sé suivan son rishèss an sik. Moin la di azot bann propriyétèr sharète lété galman plantèr é téi ariv pa souvan, mé téi ariv kant mèm, lo shartyé-plantèr, téi konfonn son sharjman avèk sète in n’ot é kan i domann ali konbien la fé, li téi réponn téi fé moins vi ké li l’avé trok karné.

Sa téi di pa lontan pars plantèr osi néna konpa dan l’èye é n sèrtin moman, la pèrsone i pans èl té volé, i done pi son kann lo mèm shartyé pou tiré. Sé la k’in zour l’ariv kékshoz in ga demoun l’apèl ali douz-karant-mil dé san karant kilopar la suit.

In plantèr l’avé done ali kann pou tiré, li la aksépté, mé li la trok karné : in pti sharjman ali li la fé mark dsi kar né in n’ot moun é in bèl sharjman in n’ot moun li la fé mark dsi son karné. Lo ga la éspèr ali dovan la boutik épi la dmann ali konbien son sharjman téi pèz. Li la réponn douz-karant. Tout lo moun té la la pète a rir pars l’avé in pé ‘tan demoun l’avé débisk ali. Donk pèrsone la pi donn ali kann pou tiré, é li la gard lontan mèm lo sirnom douz-karant… Aprésa li l’ashète in dé tone sink Renault é li la kontinyé tir kann pou sak téi koné pa son tik-tak.