Oté

Douz zour pou oir in danzé arivé ? La vitèss néna son tan, mé kant mèm

Justin / 10 out 2020

JPEG - 43.6 ko

Mé zami d’apré bann nouvèl l’aktyalité ni pé lir dann zoinal lil Moris, i diré, oplis i sava oplis nout bann kouzin-kouzine (si la pa nou mèm) néna trou dann ba avèk zistoir lo Vrakier zaponé, lo Wakasio… Dizon dsi la finisyon va oir lo danzé, mé pou l’instan d’apré bann nouvèl nou néna in katastrof ékolozik lé prèss sir pou arivé.

Si tèman ké bann parti lopozisyon morisyène la donn in konférans de prèss pou koz in mèm voi dsi lo danzé k’i ménas. Paul Béranger pou lo MMM, Xavier Duval pou lo PMSD, Navin Ramgoolam pou parti travayist, é pi Boolel konm shèf l’opozisyon la koz in mèm voi pou dénons sak pou zot sé in éskandal épi la domann la démisyon lo minis l’anvironeman épi lo minis la pèsh pars zot lété pa asé prévoiyan, épi zot la pa atak lo fénomène a tan... Dopi La Rényon dovan mon télé épi kan moin téi lir zoinal lil Moris, moin téi pans an moin-mèm bato-la, épi la mèr lé pliské zantiy laba. Vi ké tousa i éspas s rant in gran Vrakyé épi in ban d’sab é konm rogardèr demoun Maurice.

La MBC téi fé roportaz, la popilasyon konm in bann éskout téi prépar bann boudin la paye kann pou kal lo maré noir. Mi doi dir, moin mèm moin lété andormi par la fason banna téi prézant l’afèr - dizon in prézantasyon konm dann tan RF0 kan téi vé absoliman amontr anou tout i roul ron konm la boul karé dsi la tab plate. Mél o fin mo, lo vré mo, téi falé atann la réalité bann fé.

Solman prann douz zour pou konprann in sityasion sa lé in pé for sa. Lé in pé for, pa arienk pou gouvèrnman morisien, lé for galman pou La Coi, épi pou gouvèrnman fransé ; ziska Didier Robert la rapèl li lé pou in laksyon komine épi pèrmanant bann défansèr la biodivèrsité… Alé, mi arète tèr-la pou zordi, mé l’afèr lé pa fini, li fé arienk komansé é lo réizlta final i rèss a oir. Sirtou avèk lo tan ké la pèrd. douz zour pou oir in danzé arivé ? La vitèss néna son tan, mé kant mèm.