Médame, zé méssyé, la sossyété koze èk mwin sé koze èk in kouyon mé sé o pyé d’lo mir k’i oi lo masson.

Ala pou zot konm pou mwin in konsèye sazèss. Mi sava pa dire azot kossa sa i vé dir, pars mwin lé sirésèrtin mon bande léktèr Témoignages zot la fini konprande kossa mi vé dir dann kozman-la…

Zot i rapèl listoir « La fèss an or » ? Sa zistoir la sère ti-zan téi vé pa maryé, alor la di avèk son famiye èl i vé bien maryé mé avèk in moune néna la fèss an or é konm zot i koné Grandyab la fé fère in kok métal doré-li la anroul son ké d’dan épi li la parti domande lo fiye an maryaz. Apré in bon linspékssyon la famiye la aksèpt ali : li téi korésponde avèk sak la sère Tiz-zan téi vé... Apré lo zistoir sé lo zistoir é grandyab té Grandyab é son mové défo la pa tarde pou li amontré… donk sa i vé dir pou toute sak i lir mon kozman, méfyé laparanss ! Pars souvan-défoi na pwin arien lé tronpèze konmsa.

Alé ! mi kite azot rofléshi la dsi é ni artrouv pli d’van. Sipétadé.