Oté

« Dovan mon port la poin lion »

In kozman pou la rout

Justin / 21 févrié 2020

JPEG - 43.6 ko

Mésyé, Médam, La sosyété, koz èk moin sé koz èk in kouyon, mé sé o pyé d’lo mir k’i oi lo mason. Zordi ni sava sèye oir in kozman lontan téi ansèrv bonpé mé dizon la pa in provèrb.dizon sé arien k’in patoi konm i di sa avan-pétète zot la zamé ansèrv ali, pétète zot la fini ansèrv ali. Antouléka mi rapèl bien kan tout demoun téi i ansèrv patoi-la. Kosa sa i vé dir ? La pa sorsyé pars sinploman sé pou dir in moun i vien pa oir aou, na poin arien i anpèsh ali vnir. Bann patoi, nou téi ansèrv lontan, épi ni ansèrv zordi galman sé in zé d’langaz, in zimnastik avèk la lang é sa lé normal pou in lang é pou demoun i koz lang-la pou zoué, fé plézir azot, fé l’intérésan, kass ti boi. Nout lang épi son bann lokitèr lé konmsa : in vré plézir pou ot épi pou tout sak lé an parmi. Alé ! Mi kite azot rofléshi la dsi é ni artrouv pli d’van. Sipétadyé.