Matante Zélida la ékrir Justin :
Mon shèr nové, mon spès salté.
Zot la domandé, zot la gagné. Zot té i vé oir si Didier lété kapab fé in n’afèr ? É bin, zot i doi z’ète kontan, pars li fini pi fé l’inogirasyon. Lisé Ste-Anne, li ! Dévyasyon Sin-Zozef, li ! La fète pou maloya patrimoine l’imanité, li ! Talèr sar lo tour lo pon déssi la rivyèr Sainte-Etienne. Alors, sa i konvyin azot ? Sansa la p’assé mète ankor ? Tok ! Pran sa pou toi !

Justin la fé pou répons :
Mon vyé matante k’i koz touzour la boush rouvèr.
Mi oi ou i rogarde byin télé. Mi oi ou i gob tousala konm zèf kri. Pars sak li inoguir-la, sé sak d’ote ké la fé. Sé Konsèy réjyonal dann tan Paul Vergès lété prézidan. Si ou i anparl maloya, sa travay la MCUR. Sé èl la prépar lo dossyé é sé gouvèrnman fransé la prézanté. Poitan, na poin si tèlman lontan, bann partizan l’UMP la pa mank vomi déssi projé-la. Zordi zot i fé z’ot dimansh èk sa !

NB : Kan na poinn nouvoté, la télé i ézite pa fé manzé shofé. Lindi soir, AR l’amontr in roportaz déssi Pics, Cirques et Ravines pou l’anivèrsèr dé moi son l’inscription konm patrimoine l’imanité. Pou di koué an plis ? Aryin. Sof, momandoné, la prézant la tète lo prézidan La Réjyon. I paré lo ridikil i tyé pa !