Mé mi domande si bande demoune i fé zoinal kissoi parlé, kissoi dsi papyé, kissoi ankor dsi lo net, si banna i oz poz bande késtyon k’i fé mal é poitan mi panss bande késtyon konmsa i manke pa. Sépa si par égzanpe ni poz késtyon bande zanfan sansa bande paran lé ankor pli maléré kan vakanss i ariv ké kan zot lé dann la pèryode lékol.

Kissa i panss lo san vin mil pèrsone i manz arienk in ropa par zour é la fasson zot i pass bande pèryode vakanss. Kissa i anparl lo karante pour san dmoune i viv sou pa d’porte la povrété, é lo disète pour san i viv karéman dan la mizèr — kissa i panss la moityé bande zanfan k’i viv dann in famiye pov é koman zot i fé pou pass lo tan d’vakanss é kossa vakanss i roprézante pou zot.

A ! lé pli fassil align bande shif l’ède pou bande famiye : sa i fé dé mil é dé san, lé vré, mé sa i sifi pou pa z’ète rante la fain épi la sassyété — konm i di. Lé fassil galman anparl la solidarité intèr-zénérassion pars sa i done anou sak ni pé apèl la bone konssyans. Zamé in mami osinonsa in papi va lèss son pti zanfan mank manzé… Zamé, oui ! mé kan sé lo mami èl mèm épi lo papi i manke lo nésséssèr toute l’ané, koman i fé ?

Mézami sa i fé 77 zané nou lé dann départman franssé, départman inn an parmi bande péi sak lé pli rish dsu la tèr é finalman néna touzour in kantité pov, néna touzour in kantité demoune mizèr é la pa zot lo sizé prinssipal i okipe bande pouvoir piblik… Mi panss pa sé kékshoz lo doktèr Raymond Vergès téi vé kan li la fé vote son loi dsi l’égalité… Si zordi, dopi landroi li lé, si li pé rogarde la réalité noute péi la Rényon, mi panss li doizète déssi. Fyèr pou bonpé zafèr mé déssi galman pou bonpé zafèr é anparmi, pou sak mi sorte mark an-o la.

Noute parti an tan ké kontinyatèr Dr Raymond Vergès i arète pa propoz bande solission, mé bande pouvoir piblik i tienbo pa konte an final de konte. Ziskakan,

A bon antandèr salu !

Justin