Matante zélida la ékrir Justin :
Mon shèr nové, mon spès salté, mi sipoz ou lété kontan dimansh. Mi parl pa ou lo gran l’aviyon, mi parl aou lo mouvman déssèrtin moun la fé la-ba Lazaret. A oui ! Pou ète kontan, zot lété kontan, solman, pardon éskiz si mi di azot, sa in satisfaksyon san landomin. Pars bann rouj-de-fon, na poin in l’éspès nana léspri torte konmsa... Zordi zot i fé la fète in l’androi, domin ou i aprann i sava kass lo landroi pou fé lo tram-trin... Touléka, sé sak domoun byin intansyoné i di, é moin mi kroir azot. Donk si ou lé kontan, ou lé kontan, si ou lé malkontan, ou i pran konstan. Tok ! Pran sa pou toi !

Justin la fé pou répons :
Mon vyé matante k’i koz touzour la boush rouvèr, oplis inn mantri lé bèl, oplis ou i gob sa kom zèf kri ! Pars promyèrman, konsèy zénéral i kontinyé aranj l’andoi... Konmsa sé in patrimoine k’i anpèrd ar pa. Dézyèmman, lo prézidan konsèy rézyonal la di, landroi-la... sa in "lieu de mémoire" an parmi sak lé pli inportan pou nou... Mé, pou amontr aou, si lé ankor itil, ké out shoval sé inn bourik, m’a dir aou, moin la antandi lo prézidan domann demoun té la byin arfléshi, pou drèss kabaré, dann l’androi mèm, in moniman i mérite l’istoir toute bann Rényoné... sof ékèl kontinan zot i sorte, sof kan zot l’arivé dann nout péi... Sa i boush pa oute také sa ?

Justin