Demoun Bèl-Pyèr la grévé ! Pa toulmoun biensir, mé in pé an parmi sak lé shomèr. Konbien shomèr nana dan l’androi ? Lé domaj, mé mi koné pa. Sanm pou moin, i doi an avoir in pèrsone dsi troi an az pou travay, vi’k, konm di lo kont, sé lo ratio dan la popilasyon La Rénion. Oubli pa, nout péi lé plis ataké par shomaj ké la plipar bann réjyon l’Erop. Donk, d’apré sak banna té i di, zot lé a-bou, é zot i koné, shomaj sa in n’afèr i fé mal. Biensir nana sak na lo RSA, mé na sak la poin l’az é la poin arien...
Moin la antann in moun apré di dann radio, so bann moun-la na l’èd gouvèrnman, alor kosa zot i vé ankor ? Na in n’ot la di, zot na ka alé rod travay ! Lé dir antann sa, pars si lété si fasil ké sa, noré poin san-sinkant-sis mil pèrsone inskri Pol anploi, noré poin non pli soisant pour san bann jèn dann shomaj. L’èr-la, mon kèr té i singn pou banna, pars i fo antann azot pou konprann lo dégré d’soufrans. Lo gouvèrnman i pé pa fèrm lo zyé dsi in n’afèr konmsa, pars si lé vré nana in prinsip i apèl la kontinuité de l’Éta, nana galman in kontinuité dan la résponsabilité. In pé i parl droi èt dédomajé. Mi doi dir, fitintan, moin lété pa tro la èk sa, mé zordi, vi lo traka nou lé d’dan, mi pans ni doi réklam in n’afèr konmsa. Mé nou va arvir dsi sa in zour.
Pou l’instan, mi ékout épi mi antann va done anou kontra d’avnir. Na mèm in dépité la di, nout droi sé sèt-ui mil kontra dsi in total san-sinkant mil. Mi pans li la di sa, mé lo minis Lurel la pa pran l’angajman dann z’afèr-la, é gouvèrnman li mèm, mi antan pa li kozé. Mé va vnir, é zour-la, moin la pèr in bonpé rantre nou lé riskab èt désu. In son moin la antann : I paré la komine Sin-Dni i vé, anparmi lo bann kontra, mèt bann moun nana CAP pti z’anfan. Poitan, CAP, sa in diplom sa ! I paré galman, sa in minis la di, va mèt bann Bak plis la-dan dan l’édikasyon nasyonal. Bak, sa in diplom sa si mi tronp pa ! Sa la pa in tik-tak pou anbosh bann diplomé rényoné ba-pri sa ? Tansyon pangar, in pé i rod déza roul anou dan la farine ! Tansion pangar, si ni bat lo zyé, in pé va tir malol.

Justin