Na dé-troi zour par-la, moin la antann in sobatkoz dann radio France-inter. L’avé in bann z’aktèr kiltirel té apré diskit dsi sak zot téi apèl bann prodiksion kiltirel. Désèrtin té i oi arienk lo rol ékonomik bann manifèstasion kiltirel, d’ot téi oi sirtou lo rol kiltirel san tro pran an kont lo rol ékonomik. Pou sèrtin i fo la kiltir i amenn larzan, pou d’ot mèm si na in défisit larzan , sa lé pa inportan vi k’la kiltir lé pa fé pou raport larzan é tout fason sé l’éta ki doi boush lo trou.

Sa i amenn amoin a parl la mézon di volkan pa pou fé in kritik ni in déskripsion pars moin la pankor vizité é lo pti gigine bout la amontr dann télé i sifi pa pou moin fé mon l’opinyon. Lo zour v’arivé moin va donn mon l’opinyon mèm si mi pran pa moin pou in l’avi otorizé. Mé sak mi romark sé ké nana pou katorz milyon la-dan, é mi domann amoin kosa in n’afèr i doi améné konm rotonbé pou valoir la pène fé in l’invéstisman komsa. Sé in késtyon, sa la pa in répons !... Ni pé kant mèm dir, lo promyé rol in prodiksyon kiltirel, sé aport l’informasion k’i fo, la pédagoji k’i fo dsi kékshoz inportan dann nout zéografi pars sé in volkan la mète nout péi o mond é volkan sa i zoué in gran rol dann nout kultur é pétète sé in volkan, in zour, va fini avèk nou. Mi di pa sa pou fé pèr d’moun mé mi di kant mèm sa i pé arivé. in légzanp ? Dsi la tète bann Sin-Dni na in volkan i apèl Pik Adam, in volkan étinn, mé oi in pé si sa i révèy in kou...!

Astèr lo rol ékonomik li pé ète inportan mé dizon li lé pa fé pou sa, sé konm in konsékans. Li fé travay demoun, li donn travay bann komèrs, pétète demoun va sort péi déor pou vizit ali. Donk sé in n’afèr k’i kont mé ni pé dmandé si li lo mézon li-mèm lé blijé fé bénéfis, sansa kisa i doi boush lo défisit si nana in défisit. Konm lé shoz lé pa tro klèr dann bidjé réjyonal, pé tète la prévi in klign bidzétèr pou konpans lo défisit shak ané, pétète pa... L’èr-la mi kroi in pé i koné pa tro konté... Sak mi koné, san konpar inn avèk l’ot, lo rotonbé la mcur noré té dis, san foi pli inportan ké la mézon volkan. Sa sé in n’ot zistoir é na lo tan pou débate mé mi pé pa anpèsh parl la kiltir san parl la MCUR.

Justin

NB : I paré lo bidzé lo ministèr la kiltir sé moins in pour san bidjé l’éta, é la par la kiltir dann lo PIB sé plis troi pour san, Donk, la kiltir sé pa solman in mashine pou gaspiy larzan, la pa non pli in n’afèr pou fé arienk lo profi, mé konm i di souvan lo dévlopman dirab lé bon poul’ékonomi, lé bon pou lo sosyal,i doi pa gaspiy l’anvironeman é konm i di, alon pa obli l’éfé ké zot nana lé inn dsi lé zot.