Kossa k’i marsh bien ?

Ni pé oir bande zanfan rényoné i sava lékol normalman, néna médsin in pé partou dann toute kartyé, noute rézo routyé lé a popré bon, néna la poliss, néna la zistiss, dolo i ariv ziska noute kaz, léstréssité galman, magazin nou néna magazin, téléfone néna in paké konpagni, lintèrnet i mank pa nou. Ni pé fé léspor... Mi arète-la pars pou fé in bilan i fodré kant mèm pti modékri.

Kossa k’i marsh pa bien alor ?

Dabor nou sé in départman la pa dan lé norm, in pé i di mèm i fo shanj lozissyèl pars néna plizyèr voiyan o rouj é pa arienk dopi koméla : lo nonb zilétré i bouz kaziman pa, la santé noute popilassion néna tandanss pa tro amélyoré, la vi lé touzour shèr, shomaj i fatig anou, noute bande prodikssion lé pa sa, épi noute balanss komèrssyal i sava an déklinan. Nou la pèr sépa koman bande péi lé dann noute voizinaz i bate ankor in pé pliss noute prodikssion atèr.

La réissite individyèl OK, mé palaréissite kolètiv !

Astèr kan wi suiv la télévizyon épi sak i apèl la bande passante, wi apèrssoi néna demoune-sansa l’antropriz –i réissi bien : médaye an or par issi, médaye an or par laba, kalité ékstra pou noute prodikssyon kafé, jéraniom, lo té épi la vaniye. Ziska invante mashine nou lé kapab é lo dèrnyé mwin la romarké sé lo robo pou fégone flèr vaniye- Edmond Albius la du rotourn dann sa tonb- mé in lésploi, sa i apèl d’ote é nou l’ariv in l’épok toute rokor lé fé pou éte batu a komanssé par bande rényoné kalifyé.

In sistèm pou shanjé assiréman.

Sa i fé dir amwin, mézami, ni viv dann in sossyété épi in péi la réissite pèrsonèl-individyèl-sa i égziss mé sé la réissite koléktiv k’i gaze pa é pou k’li gaz ni oi bien néna dé shoz a shanjé. Pa sir sa i pass par in bone zéstyon sak iégziss mé plito an shanjan sak i égzist é an promyé lo sistèm politiko-administratif.

A bon antandèr, salu.