Mézami lo kassaz lé kui i date pa d’yèr sa La Rényon. Mi panss li lé ossi vyé ké noute nassion kréol é sé la d’dan lo pèp la konstrui son limour kréol.- in koté inportan pou noute kiltir réyonèz. Limour rényoné, sa sé in kassaz lé kui ni fé pou nou, ni fé pou lé zot é si sa i guéri pa noute maladi, sa i ède anou bien siporte noute maléré sor.

Lo kozman mi di azot zordi sa in kozman noute granèmèr Berthe té i ansèrv pou dir la mizik lé monotone, konm la mizik l’égliz dann tan mwin lété marmaye é kom èl téi yème pa la mizik-la él lété kritike kan èl téi antann bann shanté légliz. Mwin l’avé in frèr téi apèl sa la mizik mal-o-vante — pou li, la mizik klassik lété galman in mizik mal o vante mé mwin téi kontante dir azot mwin téi yèm bann shanté la, pars li téi transporte amwin dann in monde mélankolik.

Zordi nou lé pi ladan é bann kantike mi trouv lé bien modèrnizé é sa i fé plézir amwin. Arzoute èk sa néna lo paroli an kréol é pou mwin sa sé in viktoir mi panss mwin ossi mwin néna mon par ladan.

Alé ! Mi kite azot rofléshir la dsi é ni retroub pli dvan, sipétadyé.

Justin