Mon kamarad Pilplate - sa son pti nom sa - i di amoin konmsa : « Si mi di a ou, moin nana mon CAP lélvaz ti koshon dann boi avèk dé lopsion, tir ni guèp épi poz gob pou kol zoizo. Kossa ou i di amoin ? »
Mi fé ali pou répons son tète lé piké, li nana in kankrola dann son plafon, épi afors boir, son sèrvèl lé konm in léponz. Pou fini mi di ali, li la poin okin diplôme ditou. Vik li la sirtou parti lékol dovan la port.
Li arvir amoin : « A bon, Lé konm sa don ? Donk moin sar blizé anvoy aou tribinal ! Pars ou la difame amoin... Ou la pa antann Sin-Pier la-ba, ministrèz la zistis la fé in prosé in lavoka akoz lo boug la di, èl la prétann an avoir in diplôme èl la poin. »
Dann mon kèr, mi mazine si moin té a la plas la ministrèz, moin noré pa fé arien, vik lo dézord in prosé lé riskab fé amoi nn tor, fémal amoin plito, sirtou k’banna i di, lavoka la lé pliské malis : li lé riskab trouv son kontan la-dan, artourn amoin, konm i artourn in boné zourite*...
Alor madam la ministrèz, la tète i ansèrv pa solman pou pégné, i ansèrv galman pou kalkilé. É bin ! la tète, i travay pa don ?

*Bann péshèr zourite i artourn sak zot i apèl lo boné, pou fé arète lo bébète trankil.

Justin