Date néssanss : 1982 par la déklarassion dann Port-Louis épi 1984 dann Sésèl.

Nou la fine dir kan i rogarde dsi l’internet la COI, kan i ariv lo tour La Rényon, lo site lé vide konmsi La Rényon lé ayèr, konmsi nou lé dann in n’ote loséan ké loséan indien é pou bien fé boir anou lo kaliss ziska la lie, i mète in rényoné dann biro la coi alé oir La Rényon na poin son plass ladan sof a fé sibir anou in grav kriz noute lidantité... Antouléka, mwin pèrsonèl man mi rossan sa konmsa é kan i anparl la COI, toultan mi sava rogarde kossa néna dsi La Rényon é mon pé d’san i bouye kan mi oi noute péi néna poin son plass ladan.

Néna dé troi zour mi oi, dann nout zoinal, in kékshoz bien intéréssan é sé koi d’apré zot : Sé La (COI), dann son prozé rézyonal lo « Dévelopman bande zindistri kiltirèl épi kréativ dann lo lindianosséani » i lanss son formassion dsi lo patrimoine noute réjyon.

Mi di dann mon kèr : Ala in bon n’afèr pou nou késtyon k’i lèss pa nou tonbé konm in vyé shossète a trou. Mi di dann mon kèr, ala anfin in projé kalou pou nou, in prozé formassion, konm in prozé pou mète anlèr noute partrimoine.

In pti pé pli ba néna lo kalandriyé la formassion é mi sava déssi é mi oi :

• 21 - 28 zyin 2023 : L’inion bannzil komor
• 28 zyin - 10 zylyé 2023 : Madégaskar
• 24 zylyé – 2 août 2023 : Moriss
• 2 - 10 août 2023 : Sésèl
• 05 - 18 séktanb 2023 : Mozanbik

Mi lir dë kou é mi oi pa La Rényon. La Rényon lé anparmi bande zaboné abssan. Mwin lé a d’mandé si issi nou na poin patrimoine, si ankor in kou ni égziss pa pou la COI. L’èr-la mwin lé an kolèr, bandé an trante siss é mi domande an mwin mèm kossa i fo ni fé pou gingn lo droi égzisté dann La COI é mèm dann loséan indien.

Si pou alé maron, nou v’alé maron pars éte dan in l’androi é k’i sèrv de nou an shifon d’pyé mi pé dir mi apréssyé pa ditou.

A bon antandèr, salu !