Solon bande travayèr, zot la mète atèr pars in dalon azot lété maltrété par in kadr. Sa i ariv tazantan in n’afèr konmsa.Sa i ariv kan la dirékssyon i fé pa son travaye konm i fo. I lèss lankadroman konporte ali d’in mové fasson .. Dann lo ka k’i okipe anou, i parétré lo konportman lo kad i rolèv pliss d’in arsèlman moral ké d’in manajman an bone é du forme.

Antouléka lo poinnvizé toute bande travayèr sré inanime vi ké plis 95% rantre zot la mète atèr.

Dopi inn-dé zour bande plantèr zot mèm i komanss trouv lo tan tro long. La grèv i anpèsh azot liv zot kann é si sa i kontinyé, lé riskab fé pèrde azot larzan, é anpliské sa zot i koné pa si zot va gingn liv toute zot kan é konbien lé riskab rèss o pyé.

Bande sindika plantèr noré pu rotourn azot kont bande travayèr é kékpar fé in l’alyanss kont natir avèk bande patron lizine sikriyèr . Mé noré té konmsi zot i obliye bande sindika travayèr l’amontr zot lété solidèr avèk bande plantèr néna poin si lontan ké sa.

Otre tan, otre meurs é lé bien ke lé shoz i spass konmsa.

A l’èr mi ékri, ni koné pa ankor kossa bande travayèr va gagné, mé ni pé kant mèm éspèr zot va gingn kékshoz avèk la vi plizanpli shèr, l’angajman l’éta pou la filyère kann, é la solidarité rant bande travayèr épi bande plantèr..in dézyèm somen la grèv i komans é lé souètab la dirékssyon lé pli intélizan dann son manajman.

A bon élkoutèr, salu.