Avèk mwin pou ékoute la radio l’avé in rényoné an vakanss La Rényon apré in gran karyèr fé dann in komine La Franss é li konm mwin nou la romarke in n’afèr : bann zoditèr rényoné i poz késtyon dsi toutezafèr, i fé bann roprosh dsi toute zafèr, é zot néna zidé in pé dann toute domène. Dann toute ? Mi koné pa si sé in azar mé nou la pa antann poz késtyon dsi travaye. I arsanm bann zoditèr l’avé poin d’késtyon pou poz dsi lo travaye é lo marmaye konm mwin ni domann anou pou koué.

Ni di pétète pars travaye lé rar konm korn lapin é bann zoditèr i poz pa késtyon la dsi méssyé lo mèr pars i sèrv pa arien. Pé s’fèr sé lidé k’i viv mal an travayan é san travayé. Pé sfèr ankor la vi lé si tèlman shèr ké lo pti pé d’larzan la fine tonm dann la kèss bann grann sirfass avan d’ranpli frizidèr kréol… Néna pétète d’ote rézon mé konm la pa tèste bann zoditèr lé sirésèrtin sé in mistèr ni konétra pa zordi ankor.

La vi lé shèr sa ni koné mé sirtou pou sak porte-fèye lé plate pars sète porte-fèye lé ansinte la vi shèr lé pa vréman zot traka pars pou zot in moi i anshène avèk in n’ote, épi in n’ote ankor si tèlman zot i pé san problèm arzwinde lé dé boute par l’milyé. Pou sak larzan lo moi i fini lo kinz défoi avan ébin zot i koné toute bann fissèl pou lite konte la fain zot famiye é in moi sir l’ote sé touzour lo mèm zafèr : alé rode l’ède partou ousa l’ède i lé.

Alor domann lo mèr si dann zot famiye inn ou l’ote i pé gingn in travaye, ni pé dir sa lé pi tro a l’ord di zour, pars l’orde di zour sé d’rovoir an gran noute sistèm ékonomik é sa kréol i koné é la pa bézoin demoune avèk bak pliss vinn-sink pou ésplike azot sa.

A bon antandèr salu !