Yèr midi moin té apré agard in l’émisyon dann télé dsi lo famé kovid diznèf é moin téi sèye dékod sak bann tète dozèf – an langaz bien poli i apèl sa bann zékspèr - té apré di kan toudinkou inn dan la band la fé konm rofléksyon : « Lé kant mèm in pé for ké dopi la maladi la déklanshé tout bann péi la pa gingn mète azot dakor dsi in léstratézi parèye pou vanj kont la maladi ! »

Apré zot la éspliké : dann la Belzik i fé tèl shoz somenn isi é i arfé lo kontrèr somenn d’apré, dann Léspagn mèm to, dann La Frans galman, dann L’Amérik i fé si i fé sa é an finn kont la plipar bann péi i tienbo lo dosi di panyé i koné pa, l’èr ki lé, dsi kèl pyé i fo dansé - si i pé koz konmsa, dann in péi mèm lo dansé li mèm lé konm défandi.

Momandoné, néna inn an parmi lo bann tète moin la di an-o la, la fini par di lé dann in ka la médsine modèrn lé dann l’éshèk pars lo viris i suiv pa la lozik la syans modèrn… Mi aréte si zot déba rant zékspèr é mi domann kosa so bann zofisyèl i pé konsèye nout bann ti kolon isi La rényon. Kisa i pé di kosa nout bann ti kolon i pé fé, i pé pa fé konm léstratézi pou lite kont la maladi ? Minis la santé i sava koz asoir, mé pou di kosa. Bann zoinalis épi bann zékspèr zot mèm i ri é sa i rapèl amoin késhoz.

Mi souvien fitintan moin la lir dann in zoinal de frans in zistoir dsi in katégori sinz té i viv dann Japon. Figir azot bann sinz – la té si tèlman dépité par sak i ariv azot ké zot té kontan kan i ariv in malèr inn rant zot é si demoun i sokour in sinz la kapoté épi i gingn pi romète dobout, lé zot lété an kolèr, dépité, pars i sov inn rant zot plito ké lèss mor.

..ébin figir azot kan bann zoinalis la mète a rir, moin la pans bann sinz-la é moin la di dann mon kèr : si in zour ni ariv a pi oir klèr ditou dann in maladi, si ni ariv a préféré lo fiasko tout bann éstratézi la lite plito ké la réisiste, zour la nou sar pa loin kite lo mond ni koné pou plonz dann l’inkoni.