Mé oila, la pa sak mwin téi kroi, an kontrère ! Néna bande zom politik épi bande fam politik, néna bande zélu lé popilèr issi la Rényon, mèm néna pliské popilèr… Alors, mi diré, la pa par zot demoune la Rényon lé an kolèr. Si lété par zot lo sondaze nora pad one sak li la doné. Sondaze triké ? Néna lontan mi kroi pi sa.sondaz lé santifik épa arienk kan li di sak mi yème antande.

Alor bande zéléktèr lé an kolèr é d’apré mwin zot kolèr lé lézitime : mi sorte lir dé-troi kozman Elie Hoarau la di, mèrkrodi dann son konférans dé prèss. Solon li kan i fé lo bilan la sityassion rényonèze, sityassion-la lé pa bon kissoi lo nonb shomèr, kissoi toute sak i rode in lojman é i gingn pa, kissoi la vi shère, kissoi l’éshèk lékol. Ni pouré ankor parl linégalité-linzistis sossyal-, la mizèr, lo manke konsidérassion in bonpé d’moune i soufèr dann in péi néna pou drapo « lo viv ansanb »

Mé bande rényoné lé pa kontan par raporte in sistème gouvèrnman l’amenn azot dann in train konmsa é solon noute kamarade Elie, i f opa konte dsi gouvèrnman-ninporte ékèl – pou tire anou dann trin-la. La loi Macron ? Fyé pa dsu. La loi Le Pen ? Fyé pa dsu . La loi l’ote é l’ote é l’ote ? La Rényon la pa pou avanssé é son dévlopman dékolé.

Alor ! Kèl loi ? Kèl gouvèrnanss ? In loi Rényoné avèk in lakor rante lo moune néna La Rényon pou in vré dévlopman. Si konm bande rényoné i kroi bande zom épi bande fam politik La Rényon lé valab. Akoze pa fé azot konfyanss san atande ankor sinkan pou di kan v’ariv l’ané 2027 : la pa avanss inn tyork ankor in kou.

Justin